Operacionet e kërkimit-shpëtimit vazhduan edhe sot për tre marinarët që rezultojnë të zhdukur një ditë pasi një aeroplan transporti i marinës amerikane u rrëzua në pjesën perëndimore të oqeanin Paqësor.

Aeroplani u rrëzua 925 kilometra në juglindje të Okinavës, ndërsa transportonte pasagjerë dhe mallra nga një bazë amerikane në Japoni, tek aeroplanmbajtësja amerikane “Ronald Reagan”.

Sipas zyrtarëve rreth 40 minuta pas incidentit u arrit të shpëtohen tetë vetë. Ata u dërguan menjëherë tek aeroplanmbajtësja amerikane dhe u raportua se gjendja e tyre shëndetësore është e mirë.

Marina njoftoi se anije dhe avionë amerikane e japoneze po kryejnë kërkime në një rreze prej 320 miljesh detare.

Ende nuk janë dhënë shpjegime mbi shkaqet e incidentit, por sipas marinës ngjarja po hetohet.

Përplasja e së mërkurës llogaritet të jetë incidenti i pestë serioz i regjistruar këtë vit nga marina amerikane në ujërat aziatike.

Dy aksidente me pasoja fatale, ku u përfshinë anije, lanë pas 17 marinarë të vdekur dhe nxitën departamentin e Mbrojtjes të marrë vendim për të larguar nga detyra tetë oficerë të lartë të marinës, përfshirë edhe komandantin e flotës së 7-të.