Një shtetas italian, i cili kërkohej në Spanjë për vrasje, është arrestuar në Portin e Durrësit. Ai ka tentuar që të kalojë kufirin me dokumente false dhe nga hetimet e kryera  rezulton se ishte i shpallur në kërkim ndërkombëtar. Në pranga ka rënë shtetasi  Giuliano Velo 58 vjeç, lindur dhe banues në Itali.

Velo, më datë 27 shtator 2017  është kapur në Drejtorinë Rajonale për Kufirin dhe Migracionin Durrës, pasi ka tentuar të kalojë kufirin, në drejtim të Italisë me pasaportë dhe kartë identiteti Sllovene të dyshuara se janë false.

Nga hetimet e mëtejshme të kryera nga Specialistët për Hetimin e  Krimeve të Rënda në Drejtorinë Vendore të Policisë Durrës, u evidentua se për shtetasin e mësipërm  është lëshuar Urdhër Arresti nga Interpol Madrid Spanjë duke e shpallur  në kërkim ndërkombëtar.

Gjykata Themelore e Lorca (Murica)/ Spanjë  ka lëshuar Urdhrin e Arrestit për kryerjen e veprës penale “Vrasja”  parashikuar në nenin 138, 139,140 të Kodit Penal Spanjoll. Maksimumi i dënimit  për këtë vepër penale është 25 vjet burg.  Giuliano Velo dyshohet se më datë 9 qershor 2017 rreth orës 21:30 me orën lokale, në vendin e quajtur ” Paraje Charcon” të qytetit Aguilas/ Spanjë,  ka vrarë me armë zjarri një shtetas Italian. Materialet i kaluan Prokurorisë Durrës për veprime të mëtejshme.