Asgjë konkrete nga takimi i parë mes Ahmetit dhe Zaev, pasi ky i fundit e mori edhe zyrtarisht mandatin.

Pas dy orëve bisedime, Ahmeti u largua nga selia e LSDM-së pa u prononcuar për mediat.

“Në periudhën që vjen do të intensifikohet dinamika dhe bisedimet në mes dy partive, përfshirë këtu edhe partitë që dhanë mbështetje për qeverinë e re të Republikës së Maqedonisë, që më pas të kalohet në zgjidhje konkrete për postet dhe ministritë”, thuhet në kumtesën e lëshuar nga LSDM.

Por zëdhënësi i partisë, Petre Shilegov insiston se ndarja e resorëve nuk është më e rëndësishme se rikthimi i funksionimit të sistemit.

“Është e parëndësishme çështja e ndarjes së resorëve, apo ndarja personale e emrave dhe resorëve sipas partive politike. Ajo që është më e rëndësishme për Republikën e Maqedonisë, është që vendosim principe të funksionimit të sistemit, funksionimi i një qeverie që qytetarët do ta ndjenjë si të veten. Nëse mbeten principet e njëjta, apo mënyra e njëjtë e funksionimit të sistemit dhe të qeverisjes, atëherë aspak nuk është e rëndësishme ndarja e resorëve dhe zgjidhja kadrovike”, tha zëdhënësi i LSDM-së, Petre Shilegov, njofton TV21.

Gjatë ditës së djeshme, kreu i BDI-së, Ali Ahmeti, deklaroi se pret që bisedimet të përfundojnë shpejt.

Menjëherë pas marrjes së mandatit, paralajmërimet nga shumica parlamentare ishin se bisedimet do të përfundojnë brenda 10 ditëve.