AAK e befasuar me ndalimin e Kelmendit

17:20 | 10 Qershor 2015
M. A.

Aleanca për Ardhmërinë e Kosovës (AAK) është e befasuar me ndalimin e anëtarit të kryesisë së partisë dhe profesorit të nderuar, Muhamet Kelmendi, nga policia e Kosovës, sot në Mitrovicë.

AAK thotë se “Kelmendi u ndalua befas, me pretekst krejt të pakuptimtë për veprimtarinë e tij, derisa po udhëtonte në Boletin, në ceremoninë e rivarrimit të eshtrave të Heroit të Kombit Isa Boletini”.

AAK konsideron se profesori i respektuar, Muhamet Kelmendi, asnjëherë dhe në asnjë rrethanë nuk do të përfshihej në vepra, me pretekstin e të cilave është ndaluar sot nga Policia e Kosovës.

“Profesor Muhamet Kelmendi është anëtar shumëvjeçar i Aleancës, veprimtar i hershëm në të gjitha proceset për lirinë dhe pavarësinë e Kosovës, kurse pas çlirimit ishte deputet dhe pjesëmarrës i hartimit të shumë akteve ligjore e kushtetuese në shtetndërtimin e vendit”, thuhet në reagimin e AAK-së.