Shteti më i ri në botë, edhe pse është pothuajse i izoluar, megjithatë shënon Ditën e Evropës – 9 Majin. Kjo ditë që simbolizon bashkimin e evropianëve do të festohet me aktivitete të ndryshme nëpër Kosovë.

Kosova është shteti i vetëm në Ballkan pa liberalizim të vizave me BE-në. Numër i madh i qytetarëve, me dokumente të shumta në dorë, presin në radhë para ambasadave për ta marrë një përgjigje për një vizë, e cila do t’i çonte rrugëve të Evropës.

Sipas statistikave rreth 40 mijë qytetarë aplikojnë për vizë vetëm në Ambasadën Gjermane brenda një viti, disa prej të cilëve u aprovohet kërkesa, e shumë të tjerëve jo.

Ambasada e Gjermanisë në Kosovë

Me Ditën e Evropës, festë zyrtare, Kosova dallohet thuaja nga të gjitha vendet e kontinentit evropian, në të cilat institucionet punojnë gjatë Ditës së Evropës, ndonëse atë e shënojnë si ditë me organizimin e ndonjë aktiviteti.

Dita e Evropës zanafillën e ka te 9 maji i vitit 1950, kur ministri i Jashtëm i Francës, Robert Shuman, lexoi për shtypin ndërkombëtar një deklaratë ku i bënte thirrje Francës, Gjermanisë dhe vendeve të tjera evropiane për të bashkuar prodhimet e tyre të thëngjillit dhe çelikut, si detyrim për ruajtjen e marrëdhënieve paqësore mes vendeve.

Vendet të cilave u drejtohej thirrja kishin dalë të rrënuara materialisht dhe moralisht nga konfliktet me njëra-tjetrën. Si rezultat i këtij propozimi një vit më vonë u krijua Bashkimi Evropian, ndërsa në Samitin e Milanos të mbajtur më 1985 udhëheqësit e Bashkimit Evropian vendosën që 9 Maji të festohej si Dita e Evropës.

Dita e Evropës bashkë me himnin, flamurin, moton dhe monedhën e përbashkët- euron janë simbolet identifikuese të Bashkimit Evropian./arbresh.info