Ministri i Brendshëm Saimir Tahiri ka vizituar në spital gazetarin Elvi Fundo që u dhunua sot nga dy persona ende të paidentifikuar.

Tahiri shoqërohej nga drejtori i Policisë së Tiranës Ervin Hodaj, ndërsa premtoi se autorët do të kapen shumë shpejt.

Në një prononcim për mediat jashtë spitalit të Traumës, Tahiri deklaroi: “I shpreha gjithë keqardhjen time për gjithçka ka ndodhur dhe e garantova, bashkë me drejtuesit e policisë, që do bëjmë maksimumin që kjo ngjarje të zbardhet dhe përgjegjësit të dalin para përgjegjësisë. Do i bëja thirrje kujtdo, mbi të gjitha opozitës që të ndalë një orë e më parë politizimin e kësaj historie. Nuk bëhet politikë dhe nuk fitohen vota duke politizuar çdo ngjarje në Shqipëri. E mira është që të bëhemi të gjithë bashkë për të garantuar që Shqipëria të bëhet një vend më i sigurt dhe ku gjithkush të ketë mundësi të ushtrojë profesionin e tij pa pasur asnjë problem dhe asnjë çështje shqetësuese”.

Tahiri iu përgjigj edhe deklaratave të opozitës që lidhi sulmin e gazetarit Fundo me qeverinë, duke u shprehur: “ E dëgjova pak deklaratën e opozitës dhe të them të drejtën nuk ndjej gjë tjetër veçse trishtim. Askujt nuk i shërben politizimi i panevojshëm i çdo situate, siç të gjithë duhet të bëhemi bashkë të inkurajojmë forcat e zbatimit të ligjit që të bëjnë gjithçka është e mundur për të çuar përpara drejtësisë ata që mbajnë përgjegjësi për këtë rast apo për cilin do rast tjetër”