Për të kaluar një amendament kushtetues, Kushtetuta kërkon që pro tij të votojnë së paku dy të tretat e të gjithë anëtarëve të Kuvendit. Pra, kërkohet vota e së paku 80 prej 120 anëtarëve sa ka Kuvendi, shkruan kp.

Opozita ka 31 deputetë dhe mbështetur në qëndrimet që liderët e tri subjekteve politike kanë shfaqur, asnjë nga deputetët e tyre nuk do të votojë pro Speciales. Megjithëse, flitet që numri i deputetëve të pozitës që do t’i thonë jo Gjykatës Speciale është ende më i madh, deri më tani nga PDK-ja janë katër deputetë – Ganimete Musliu, Fadil Demaku, Nait Hasani dhe Nuredin Lushtaku – të cilët e kanë bërë publike se do të votojnë kundër Speciales. Ndërsa, ende mbetet e diskutueshme se a do të votojë edhe deputetja Flora Brovina pro Gjykatës Speciale.

Pozita vazhdon të hezitojë të deklarojë nëse do t’i kenë votat për ta themeluar Gjykatën Speciale. Por, të palëkundur në qëndrimin e tyre kundër Gjykatës Speciale, vazhdon të jetë opozita, e cila tashmë ka bërë të qartë se vota e tyre do të jetë kundër.

Ndërkaq, disa prej deputetëve të pavarur ende vazhdojnë të kenë hamendje nëse do ta japin votën pro apo kundër.