Kreu i Partisë Demokratike Lulzim Basha ka komentuar rezolutën e PE-së për Shqipërinë, që sipas tij ka vendosur edhe njëherë kusht kryesor për hapjen e negociatave zgjedhjet e lira.

Kryedemokrati shkruan në faqen e tij në Facebook se ‘Rama ka në plan të manipulojë, vjedhë dhe shkatërrojë zgjedhjet”.

“Zgjedhjet e lira janë kusht kryesor për hapjen e negociatave të BE-së me Shqipërinë. Rezoluta e djeshme e Komisionit të Jashtëm të Parlamentit Europian e ka theksuar edhe një herë zyrtarisht këtë gjë.
Ky kusht vërteton edhe një herë se plani i Edi Ramës për të manipuluar, vjedhur dhe shkatërruar zgjedhjet është rrënues për të ardhmen e vendit dhe për stabilitetin e Shqipërisë. Katër vjet qeverisje nga Edi Rama e ka detyruar Evropën t’i vendosë Shqipërisë një kusht elementar demokratik: zgjedhjet e lira”, shkruan Basha.