Kompania Ujësjellësi Rajonal “Prishtina”, ka njoftuar se faza e tretë e investimeve për fabrikën e ujit ”Shkabaj”, po shkon sipas planit dinamik dhe i gjithë projekti do të përfundojë në shtator ose nëntor të vitit 2016, ku si përfundim i  gjithë kësaj do të jetë furnizimi me ujë të pijshëm 24 orë pandërprerë.

Kurse, fillimi i ngritjes së fabrikës “SHKABAJ”, sipas një komunikate të ujësjellësit do të nisë në fund të muajit korrik 2015.

Paralelisht me fillimin e punëve për ngritjen e kësaj fabrike, sipas tyre do të bëhet edhe vendosja e gypave transportues, ndërsa stacioni i pompimit fillon më herët sesa muaji korrik 2015.

“Më datë 21 nëntor 2014 është vënë zyrtarisht gurë themelin e fazës së III-të të investimeve për Fabrikën e përpunimit të ujit “SHKABAJ”. Faza e III-të përfshinë investimin në Fabrikën e re të  ujit të pijshëm në Shkabaj në vlerë prej 35 milionë euro, si projekt i financuar nga Qeveria Gjermane dhe Komisioni Evropian përmes Bankës Gjermane për Zhvillim (KFË), Qeveria e Republikës së  Kosovës, Komuna e Prishtinës dhe Kompania Ujësjellësi Rajonal ”Prishtina”-SH.A. Gurëthemeli nuk u vendos aty ku do të ngritët fabrika e ujit, por u vendos te stacioni i pompave, prej nga edhe fillojnë punimet”, thuhet në një komunikatë të ujësjellësit “Prishtina”./arbresh.info