Tensioniet e fundit mes Shqipërisë dhe Greqisë, duket se nuk kanë kaluar pa u vënë re edhe nga Këshilli i Evropës.

Në mbledhjen e sotme të mbajtur në Bruskel dhe ku u ra dakord nga ana Ministrave të Jashtëm të BE-së për rekomandimin e hapjes së negociatave për Shqipërinë, në paragrafin e fundit, por jo më pak të rëndësishmin, KiE ndalet pikërisht tek marrëdhëniet e vendit tonë me fqinjët.

Në të theksohet se deklaratat e fundit të bëra, dhe që nënkuptojnë deklaratat e kryeministrit Edi Rama, duhet të shmangen pasi ndikojnë negativisht në marrëdhëniet e fqinjësisë së mirë.

“Këshilli mirëpret vazhdimin e angazhimit konstruktiv në bashkëpunimin rajonal dhe nënvizon rëndësinë për të siguruar marrëdhënie të mira të fqinjësisë, çka është thelbësore. Veprime apo deklarata të cilat ndikojnë negativisht në marrëdhëniet e mira fqinjësore, duhet të shmangen”. thuhet në deklaratën e KiE të zbardhur nga ana e “Zërit të Amerikës”.

Në këtë mënyrë, BE duket se “i ka tërhequr veshin” kryeministrit Edi Rama duke parë deklaratat e tij të fundit për çështjen çame, dhe probleme të tjera që lidhen mes Shqipërisë dhe Greqisë.

Po ashtu edhe pala greke, si pjesë e familjes europiane, disa herë ka paralajmëruar për veto, nëse nuk respektohet prioritetet, dhe mbi të gjitha të drejtat e minoritarëve grekë në Himarë.