Alarmi i rrejshëm për bombë në aeroplan lë presidentin maqedonas pa shkuar në Madagaskar

11:48 | 24 Nëntor 2016
M. A.

Një alarm për bombë në bordin e një avioni “Turkish Airlines” në aeroportin e Shkupit ka bërë që të anulohet fluturimi për në Stamboll.

Në bordin e avionit ishte edhe presidenti i Maqedonisë, Gjerogje Ivanonv, i cili po udhëtonte drejt Madagaskarit për pjesëmarrje në Samitin e Frankofonisë.

Por pas alarmit të dhënë nga ekipi i sigurimit të presidentit për një bombë në bordin e avionit, është anuluar fluturimi dhe janë kryer kontrolle në bord.

Një qen kërkues i MPB-së zbuloi se nuk bëhej fjalë për bombë, por për një telefon celular aktiv në bagazhin e një shtetasi turk që po udhëtonte nga Shkupi për në Stamboll.

Kompania turke TAV, e cila menaxhon aeroportin e Shkupit, njoftoi se fluturimet nga ky aeroport pas alarmit të rrejshëm kanë vazhduar pa pengesa dhe vetëm me vonesa të vogla shkaku i mjegullës.