Presidenti i Republikës, Bujar Nishani, ka kthyer në Kuvend Ligjin për mbetjet, dy ditë pasi takoi përfaqësues të Industrisë së Riciklimit dhe anëtarë të Shoqatës së Ricikluesve, të cilët i kërkuan atij të dekretojë ligjin për mbetjet.

“Ligji bie ndesh me nenin 59 të Kushtetutës, nëpërmjet të cilit përcaktohet se: ‘Shteti brenda kompetencave dhe mjeteve që disponon, si dhe në plotësim të nismës dhe të përgjegjësisë private, synon një mjedis të shëndetshëm dhe ekologjikisht të përshtatshëm për brezat e sotëm dhe të ardhshëm’. Lejimi i importit të mbetjeve referuar Ligjit, duke gjeneruar një ndotje shtesë në raport me popullsinë dhe territorin e vendit, mund të kompromentojë në mënyrë të pakthyeshme parimin e zhvillimit të qëndrueshëm të sanksionuar në Kushtetutë”, lexohet në argumentimin e presidentit Nishani.

“Shqipëria është një vend me shumë avantazhe bazuar në atë që i ka dhënë natyra dhe burimet njerëzore vendase dhe ka strategji zhvillimi në bujqësi, turizëm, energji, të cilat nëse vihen në eficencë krijojnë e do të krijojnë mjaftueshëm vende pune dhe mirëqenie në vend. Avantazhi konkurrues për Shqipërinë nuk mund të jetë riciklimi i mbetjeve të importuara”, ka shtuar Nishani. /Tch