Thaçi,Veseli e Mustafa shkelin Ligjin e Protokollit, njëkohësisht jashtë shteti

19:37 | 3 Shtator 2016
M. A.

Presidenti i Republikës, Hashim Thaçi, kryetari i Kuvendit të Kosovës, Kadri Veseli dhe kryeministri Isa Mustafa, gjenden në Romë të Italisë.

Në intervale të ndryshme kohore të tre drejtuesit më të lartë të shtetit kanë udhëtuar drejt Vatikanit ku nesër do të mbahet ceremonia e shenjtërimit të Nënë Terezës, raporton lajmi.net.

Por që të tre ata, me këto udhëtime, e kanë shkelur rëndë Ligjin për Protokollin e Shtetit. Kjo pasi vendi ka mbetur pa asnjërin prej tre zyrtarëve më të lartë të Republikës, veprim që nuk lejohet.

Kjo është e sanksionuar në Ligjin Nr. 03/L-132 për protokollin e Shtetit të Republikës së Kosovës, saktësisht, kreu IV që flet për ceremonialin zyrtar të autoriteteve të larta të shtetit, raporton lajmi.net.

Në këtë Ligj, në nenin 19, pika 4, saktësisht shkruan se “ Protokolli i Shtetit vihet ne dijeni paraprakisht për çdo lëvizje të personaliteteve kryesore, Presidentit, Kryetarit të Kuvendit dhe Kryeministrit jashtë shtetit. Vizitat bashkërendohen në mënyrë që të mos jenë të tre njëkohësisht jashtë vendit”.