Regjistrimi në veri nis më 1 tetor

09:56 | 3 Maj 2016
M. A.

Qeveria ka shprehur synimin që në gjysmën e parë të tetorit ta zhvillojë procesin e regjistrimit të popullsisë dhe ekonomive familjare në katër komunat e veriut të banuar me serbë, e që ende ia kontestojnë shtetësinë Kosovës.

Procesi nuk do të zhvillohet konform dy ligjeve bazike për regjistrimin, por me ligj të veçantë.

Me kërkesë të Bashkimit Evropian, Qeveria e ka aprovuar të premten Projektligjin që për qëllim ka regjistrimin e popullsisë, ekonomive familjare dhe banesave në komunat Leposaviq, Zubin- Potok, Zveçan dhe Mitrovicë Veriore.

Këto janë të vetmet komuna që nuk kanë marrë pjesë në regjistrimin e popullsisë, të zhvilluar në vitin 2011. Dhe, sipas memorandumit shpjegues të Projektligjit, për një proces të këtillë, paraprakisht është biseduar në Bruksel dhe BE-ja do të jetë ajo që do të heqë koston financiare.