Xhevat Bislimi, njëri nga themeluesit e partisë Nisma si dhe sekretar i kësaj partie, ka dhënë dorëheqje nga partia pjesë e së cilës ishte deri tani.

E arsye për këtë përveç tjerash sipas tij, është marrëveshja e arritur së fundi në mes të Nismës dhe Aleancës për Ardhmërinë e Kosovës, për koalicion parazgjedhor. Bislimi këtë e quan një marrëveshje tinëzare për të prishur opozitën e bashkuar.

I kontaktuar nga KosovaPress, Bislimi ka thënë se tashmë ka dhënë dorëheqje nga Nisma për Kosovën. Ndërsa nuk komenton se a do t’i bashkëngjitet ndonjë partie politike.

“Kam dhënë dorëheqje nga Nisma. Tani për tani jam qytetar i lirë. Ndërsa ende nuk kam vendosur se a do të jem pjesë e ndonjë partie tjetër politike”, ka thënë Bislimi për KosovaPress.

Bislimi thotë se “antimarrëveshja” siç e quan ai tinëzare e krerëve te NISMA-s me AAK-në, për ta prishur opozitën e bashkuar, ia vuri kapakun të gjithave dhe fundosi këtë iniciativë politike.

Ai ka falënderuar të gjithë ata që u angazhuan me mendje e me zemër kundër marrëveshjeve te Brukselit për Bashkësinë e komunave serbe, marrëveshjes për kufirin me Malin e Zi si dhe kundër qeverisjes qe po e rrënon lirinë, demokracinë, pavarësinë, sovranitetin, ekonominë dhe mirëqenien e popullit shqiptar dhe te pakicave ne Republikën e Kosovës.

Sipas Bislimit kjo parti, është përdorur si pronë private e disa personave dhe se me gjendjen e krijuar në parti, kanë mbetur larg ambicieve që kishin e që ishte kundërshtimi i marrëveshjeve të dëmshme si dhe ndryshimi i një qeverisje të korruptuar.