Me ndihmën e BERZH, Shqipëria do të krijojë Këshillin e Investimeve me qëllim përmirësimin e klimës së biznesit dhe shmangien e korrupsionit në vend. Ky këshill nuk do pengojë institucionet por përkundrazi do të kontribuojë në zhvillimin ekonomik dhe realizimin e reformave.

Lansimin e këtij Këshilli e ka përshëndetur edhe kryeministri Rama pasditen e sotme, i cili tha se në 18 muaj, qeveria ka krijuar një marrëdhënie të re me sipërmarrjen,  ku nga  720 milionë dollarë borxhe që qeveria i detyrohej sipërmarrjes, më shumë se 5 për qind e PBB-së, sot kemi kthyer mbi 300 milionë, dhe pjesa tjetër është në rrugën e kthimit.

“Ne sot jemi dëshmitarë të faktit se; nëse 18 muaj më parë morëm një trashëgimi të rëndë në raportet mes Qeverisë dhe Sipërmarrjes, ku pika më domethënëse isha barra prej 720 milionë dollarësh borxhe që Qeveria i kishte sipërmarrjes; jemi në kushtet kur mund të themi se jo vetëm 300 milionë janë kthyer pas te sipërmarrja, dhe pjesa tjetër është në rrugën e kthimit të parave tek i zoti, por edhe  sistemi i funksionimit të këtyre marrëdhënieve ka ndryshuar në mënyrë rrënjësore,” tha Rama.

Më tej kryeministri foli për ligjin e ri për investimet i cili pritet të miratohet në Kuvend pas pak javësh, dhe që do të hap një kapitull të ri për investitorët. Rama e cilësoi vitin 2015 si vit kyç për ekonominë shqiptare.

“Në javët në vijim Kuvendi i Shqipërisë do marrë në shqyrtim dhe do miratojë ligjin e ri për investimet; i cili është praktikisht një bazë e tërësisht re që zgjeron në mënyrë të ndjeshme hapësirën dhe lirinë e të investuarit por nga ana tjetër rrit në mënyrë të ndjeshme parashikueshmërinë në procesin e investimit, dhe shkon një hap më tutje në mbështetjen që shteti merr përsipër t’u japë investitorëve”, tha Rama.

Me ndihmën e BERZH, Shqipëria është ndër vendet e para në rajon, ku do të aplikohet një platformë e tillë e ngritjes dhe funksionimit të Këshillit të Investimeve. Kjo është një platformë dialogu mes qeverisë dhe investitorëve që synon adresimin e problematikave kryesore me të cilat ata përballen në Shqipëri, identifikimin e mekanizmave për zgjidhjen e tyre, si dhe përmirësimin e kuadrit ligjor, raportimin dhe parandalimin e rasteve të praktikave të padrejta dhe të pabarabarta ndaj biznesit dhe parandalimin dhe luftën kundër korrupsionit dhe evazionit.