Rikthimi i fuqishëm AKR-së në skenën politike është mirëpritur pozitivisht nga një numër i madh i qytetarëve.

Këtë e bën të ditur edhe presidenti i kësaj partie, z.Behgjet Pacolli i cili përmes llogarisë së tij në Facebook falënderon qytetarët për përgjigjet e tyre pozitive dhe masovike për mbështetjen e misionit siç e quan ai ‘për të ndaluar degradimin e mëtutjeshëm të vendit tonë’, shkruan arbresh.info

Postimi i plotë:

Të dashur miq, Ju falemnderit shumë për përgjigjen tuaj pozitive dhe masovike për të mbështetur misionin për të ndaluar degradimin e mëtutjeshëm të vendit tonë.

Çdo ditë e më tepër jemi duke u bindur se Kosova asnjëherë nuk ka qenë e rrezikuar si tani. Është shkatërruar dhe degraduar çdo cep i ambientit që na rrethon.

Gurthyeset në çdo majë mali me rrugicat e improvizuara kanë shkatërruar mijëra e mijëra hektar vegjetacion, “minierat” e zhavorit në çdo lumë e çdo vend kanë provokuar rënien drastike të sipërfaqes së ujërave nëntokësore duke provokuar toka djerrina.

Ndotjet e ambientit, ndotja e ujërave, mungesa ose shkatërrimi i shtretërve të lumenjve e bërllogu, e kanë kthyer Kosovën në deponi të mbeturinave dhe Kosova sot përmendet si sinonim i papastërtisë dhe të keqes. Kjo është duke ndikuar çdo ditë në shëndetin e njeriut.

Shkatërrimi dhe mungesa e trotuarëve, mungesa e hapësirave për këmbësorët, mungesa e gjelbërimit, parkingjeve adeguate, mungesa e kanalizimeve, mungesa e manaxhimit të bërllogut, mungesa e ujit e rrymës, i ka kthyer qytetet tona në ambiente të pajetueshme e të shëmtuara.

Ndërtimi i rrugëve pa asnjë kriter, pa sinjalistikë, pa vendkalime dhe vendlëvizje për këmbësorët, pa poceta për shkarkimin e ujërave atmosferike dhe mosmirëmbajtja e këtyre, gjatë rreshjeve paraqesin rrezikshmëri të lartë për jetën e njerëzve dhe katastrofa ambientale.

Kaosi urbanistik, “ndërtimet me leje të njerëzve të seleksionuar” i japin një pamje të shëmtuar vendbanimeve tona, kanë zënë tokat pjellore dhe përmbysin vizionin për zhvillimin dhe rregullimin e ardhshëm të ambientit dinjitoz jetësor.

Këto ishin vetëm disa fakte nga ambienti ku ne sot jetojmë e ne çdo ditë do të sjellim fakte të tjera pse duhet tani të bashkohemi e ta ndalim degradimin e mëtutjeshëm të Kosovës sonë.

A e dini se dhuna në familje e në shoqëri dhe depresioni i njerëzve është në rritje drastike? Kjo ndodh atëherë kur mungon shpresa dhe humb dashuria për jetesë.

Duhet ta shpëtojmë Kosovën dhe dinjitetin e popullit tonë. AKR-së i duhet minimumi 20% të konsensit popullor për të vepruar kundër të keqes dhe në interes të secilit. Tani është momenti, është detyrimi ynë!