Kryeministri në detyrë, Albin Kurti, ka folur pas takimit me mërgatën në Prishtinë edhe për mundësinë e arritjes së një koalicioni me kryetarin e LDK-së, Lumir Abdixhiku.

Kurti tha se gjatë ditëve në vijim do të vazhdojnë përpjekjet për të qenë sa më të përgatitur para vazhdimit të seancës konstituive për formimin e institucioneve të legjislaturës së njëmbëdhjetë.

“Do të përpiqemi t’i shfrytëzojmë këto ditë në mënyrë që të jemi sa më të përgatitur kur të vazhdojë seanca për konstituimin e institucioneve të legjislaturës së njëmbëdhjetë. Nuk mund ta parashikojmë ende fatin. Nuk do të mungojnë përpjekjet. Ekziston interesimi, vullneti dhe gatishmëria, por javën e ardhshme do ta marrim vesh gjithçka”, është shprehur Kurti.

Ai nuk dha detaje shtesë për ecurinë e bisedimeve, duke lënë të kuptohet se zhvillimet konkrete priten gjatë javës së ardhshme.//Arbresh.info