Në Ankara të Turqisë, një grua 30-vjeçare ka humbur jetën pasi ka rënë nga ballkoni i banesës në katin e 7-të ku jetonte me të fejuarin e saj.

Sipas mediave turke, pas ngjarjes është arrestuar i fejuari i saj, 46-vjeçari Fatih Ozsen, i cili më pas është dërguar në paraburgim nga autoritetet.

Ngjarja ka ndodhur më 25 mars në lagjen Yenimahalle.

Viktima, Turkan Biçer, fillimisht është gjetur pa shenja jete në vendin e ngjarjes, ndërsa trupi i saj është dërguar për obduksion në Institutin e Mjekësisë Ligjore në Ankara.

Më pas, trupi i saj është marrë nga familjarët dhe është varrosur, ndërsa hetimet për rastin po vazhdojnë.

Ndërkohë, mediat kanë publikuar edhe pamje nga kamerat e sigurisë, ku shihet çifti duke mbërritur me taksi në ndërtesë, duke debatuar në hyrje të saj dhe më pas duke u ngjitur në banesë, pak para ngjarjes tragjike.

Autoritetet turke po vazhdojnë hetimet për të sqaruar rrethanat e plota të rastit.