Policia e Kosovës ka bërë të ditur se ka përgatitur planin operacional dhe të gjitha masat e nevojshme për mbarëvajtjen e zgjedhjeve të parakohshme parlamentare, të planifikuara të mbahen më 7 qershor 2026.

Sipas njoftimit, në kuadër të këtij plani do të angazhohet një numër i konsiderueshëm i zyrtarëve policorë, kryesisht nga njësitë e rendit publik, por sipas nevojës do të përfshihen edhe pjesëtarë të profileve të tjera policore, së bashku me pajisjet logjistike përkatëse, me synim garantimin e sigurisë dhe zhvillimin normal të procesit zgjedhor.

Policia ka sqaruar se plani operacional është i ndarë në katër etapa: faza përgatitore dhe vlerësuese para zgjedhjeve, angazhimi gjatë fushatës zgjedhore, sigurimi i ditës së votimit dhe periudha pas zgjedhjeve, e cila përfshin transportin dhe ruajtjen e materialit sensitiv deri në përfundimin e procesit.

Në njoftim thuhet se faza e parë tashmë ka përfunduar, ndërsa aktualisht po zbatohet faza e dytë që lidhet me ofrimin e sigurisë gjatë fushatës.

Sipas Policisë, objektiv kryesor mbetet krijimi i një ambienti të qetë dhe të sigurt për qytetarët, ruajtja e rendit publik para, gjatë dhe pas zgjedhjeve, si dhe sigurimi i qendrave të votimit, depove komunale dhe qendrës së numërimit.

Po ashtu, PK-ja ka theksuar se do të ndërmarrë veprime ndaj çdo shkeljeje që cenon procesin zgjedhor dhe të drejtën e votës, në bashkëpunim të ngushtë me Prokurorinë e Shtetit.

Bazuar në memorandumin e bashkëpunimit mes KQZ-së, Policisë, Prokurorisë dhe Këshillit Gjyqësor, janë caktuar hetues dhe zyrtarë përgjegjës nëpër rajone për trajtimin e rasteve të mundshme që lidhen me zgjedhjet.

Gjithashtu janë emëruar koordinatorë mes Policisë dhe KQZ-së, ndërsa zyrtarëve policorë u janë dhënë udhëzime të qarta për detyrat dhe përgjegjësitë gjatë procesit zgjedhor.

Policia u ka bërë thirrje qytetarëve që të bashkëpunojnë me institucionet dhe të raportojnë çdo parregullsi apo aktivitet të kundërligjshëm që mund të lidhet me sigurinë dhe zgjedhjet.