Policia e Kosovës ka ngritur alarmin për rritjen e rasteve të mashtrimeve financiare përmes mesazheve telefonike (SMS), duke apeluar te qytetarët që të kenë kujdes maksimal ndaj lidhjeve të dyshimta që u dërgohen në telefonat e tyre.

Sipas njoftimit të Drejtorisë Rajonale të Policisë në Prizren, kohëve të fundit është vërejtur shtim i rasteve ku qytetarët pranojnë mesazhe të rreme, përmes të cilave paralajmërohen se xhirollogaritë e tyre bankare do të bllokohen nëse nuk ndërmarrin veprime të menjëhershme.

Në këto mesazhe përfshihet një lidhje e dyshimtë, ku qytetarëve u kërkohet të japin të dhënat personale dhe bankare. Pas futjes së të dhënave, persona të paautorizuar arrijnë të kenë qasje në llogaritë bankare të viktimave dhe t’ua marrin mjetet financiare.

Policia u bën thirrje qytetarëve që të mos hapin dhe të mos klikojnë në linqe të panjohura të pranuara përmes SMS-ve apo email-eve, si dhe të mos ndajnë fjalëkalime, kode identifikuese apo të dhëna bankare në platforma të pasigurta.

Po ashtu, autoritetet kanë kërkuar që çdo rast i dyshuar të raportohet menjëherë në polici, me qëllim të parandalimit të mashtrimeve të tjera dhe identifikimit të personave përgjegjës.