Kryeministri në detyrë i Republikës së Kosovës, Albin Kurti ka përkujtuar sot 6 majin e vitit 1997 dhe rënien e dëshmorit Luan Haradinaj, duke e cilësuar atë si një figurë të rëndësishme të rezistencës së armatosur për lirinë e Kosovës.

Në një postim në Facebook, Kurti ka përshkruar momentet e fundit të Haradinajt dhe angazhimin e tij në radhët e Ushtrisë Çlirimtare të Kosovës.

“Më 6 maj të vitit 1997, një grup luftëtarësh të Ushtrisë Çlirimtare të Kosovës të pajisur me armë e municione, po udhëtonin nëpër brezin kufitar, për të hyrë nga Shqipëria në Kosovë. Në krye të rreshtit të tyre, ishte Luan Haradinaj, një djalë vetëm 23 vjeçar, por shumë aktiv në organizimin e rezistencës së armatosur të shqiptarëve kundër regjimit kriminal të Serbisë pushtuese në Kosovë”, ka shkruar Kurti.

Ai ka theksuar se rënia e tij ndodhi gjatë një përballjeje të armatosur në kufirin mes Kosovës dhe Shqipërisë.

“Pranë kufirit jugosllav të vendosur dhunshëm mes shqiptarëve, rrugës nga fshati Vlahne e Hasit në drejtim të Kuzhinit, në Qafëmullar, grupi ra në pritë të patrullës ushtarake kufitare jugosllave. Luan Haradinaj u vra teksa po luftonte në këmbë, trimërisht”, thuhet në postim.

Kurti e ka vlerësuar Haradinajn si dëshmor të lirisë.

“Ai ra dëshmor në luftën e paepur të kombit shqiptar për çlirimin e Kosovës. Lavdi Luan Haradinajt, luanit të lirisë së Kosovës!”, ka shkruar Kurti./Arbresh.info