Presidenti i Serbisë, Aleksandar Vuçiç, deklaroi se vendosja e sanksioneve ndaj Rusisë do të përbënte “tradhti ndaj shpirtit të popullit”, siç e quan ai.

Në një intervistë, Vuçiç u shpreh se nëse Serbia do t’u bashkohej sanksioneve anti-ruse, ai do të konsiderohej si një nga udhëheqësit më demokratikë në botë. Megjithatë, ai theksoi se një vendim i tillë nuk do të kishte shkaktuar protesta të mëdha në vend, por do të kishte qenë në kundërshtim me bindjet e tij.

Presidenti serb pranoi se vendi ka humbur mundësi të caktuara duke mos vendosur sanksione ndaj Moskës, por shtoi se ky ishte një çmim që Serbia ishte e gatshme ta paguante për të ruajtur qëndrimin e saj.

Pas nisjes së luftës në Ukraina, Vuçiç deklaroi se Beogradi mbështet integritetin territorial të Ukrainës, por nuk do të ndërmarrë masa ndëshkuese ndaj Rusisë. Ai theksoi se Serbia i konsideron të dyja vendet si kombe vëllazërore dhe shprehu keqardhje për zhvillimet në Evropën Lindore.

Gjithashtu, Vuçiç bëri të ditur se Serbia është e gatshme të ofrojë ndihmë humanitare për Ukrainën, duke u përpjekur të mbajë një qëndrim të balancuar në konflikt.