Interi ka bërë një hap të madh drejt titullit në Serie A, pasi ka mposhtur Cagliar me rezultat të pastër 3-0 në stadiumin “San Siro”, duke u shkëputur në dymbëdhjetë pikë në krye të tabelës.

Ndeshja ka nisur me dominim të vendasve, por pa gol në minutat e para. Inter ka krijuar disa raste të mira që në fillim, ku Marcus Thuram dhe Francesco Pio Esposito kanë kombinuar mirë në një kundërsulm. Megjithatë, tentativa e Federico Dimarcos është ndalur në vijën e portës nga Michel Adopo, duke u mohuar golin vendasve.

Në pjesën e parë, Inter ka hasur vështirësi përballë një mbrojtje të organizuar të Cagliari. Para pushimit, Esposito ka pasur një mundësi të artë për të shënuar, por është ndalur nga portieri Elia Caprile, i cili e ka shpëtuar skuadrën e tij.

Megjithatë, gjithçka ka ndryshuar në pjesën e dytë. Interi i ka rritur përpjekjet dhe e ka zhbllokuar rezultatin në minutën e pesëdhjetë e dytë, kur Marcus Thuram ka shënuar pas një pasimi të saktë nga Federico Dimarco.

Vetëm katër minuta më vonë, Nicolo Barella e ka dyfishuar epërsinë me një goditje të fortë dhe precize, duke e vështirësuar edhe më shumë situatën për mysafirët.

Në fund të ndeshjes, Piotr Zielinski e ka vulosur fitoren me golin e tretë.

Me këtë fitore, Inter e ka regjistruar triumfin e tretë radhazi dhe afrohet gjithnjë e më shumë me titullin kampion në Itali. Skuadra tashmë do të përqendrohet në Kupën e Italisë, ku të martën pret Comon në ndeshjen e kthimit të gjysmëfinales.

Në anën tjetër, Cagliari mbetet në vendin e gjashtëmbëdhjetë në tabelë, me gjashtë pikë larg zonës së rrezikut për rënie nga liga.