Ushtarë nga Luksemburgu, Holanda dhe Belgjika kanë përfunduar një vit shërbimi në Kampin Film City të KFOR-it në Prishtinë, duke kontribuar në rritjen e ndërgjegjësimit situacional dhe efektivitetit operacional në rajon.

Në një komunikatë për media, KFOR ka njoftuar se ushtarët e detashmentit të Beneluksit, pjesë e Batalionit të Inteligjencës, Vëzhgimit dhe Zbulimit (ISRBN), kanë përdorur sistemin ajror pa pilot “X-300 Integrator” gjatë dislokimit të tyre.

“Ushtarë nga Luksemburgu, Holanda dhe Belgjika, që përbëjnë detashmentin e Beneluksit të caktuar në Batalionin e Inteligjencës, Vëzhgimit dhe Zbulimit (ISRBN) të misionit të udhëhequr nga NATO, KFOR, pas një viti shërbimi të përkushtuar përfunduan dislokimin e tyre nën udhëheqjen e Luksemburgut në Kampin Film City në Prishtinë.

Gjatë dislokimit, njësia, duke përdorur sistemin ajror pa pilot “X-300 Integrator” (UAS), kontribuoi në rritjen e ndërgjegjësimit situacional dhe efektivitetit operacional në të gjithë rajonin, duke reflektuar përkushtimin e vazhdueshëm të KFOR-it për të garantuar një mjedis të sigurt dhe të qëndrueshëm për të gjithë njerëzit që jetojnë në Kosovë”, thuhet në njoftim.