Presidentja e Kosovës, Vjosa Osmani, ka përkujtuar sot viktimat e masakrës në Tregun e Gjelbër në Mitrovicë, duke e cilësuar atë si dëshmi të krimeve mizore të kryera nga regjimi gjenocidal serb.

Presidentja Osmani theksoi se masakra e Tregut të Gjelbër mbetet një dëshmi e dhimbshme e mizorive të kryera gjatë luftës në Kosovë.

“Në këtë ditë përkujtojmë viktimat e masakrës në Tregun e Gjelbër në Mitrovicë, ku më 13 mars 1999, nga granatat e forcave të regjimit gjenocidal serb, u vranë mizorisht 7 civilë të pafajshëm, nga mosha vetëm 5 deri në 65 vjeç. Në këtë akt makabër u plagosën 128 qytetarë të tjerë: fëmijë, gra, pleq e të rinj, të cilët u përballën me barbarinë e një regjimi kriminal. Masakra e Tregut të Gjelbër mbetet dëshmi e dhimbshme e krimeve mizore të kryera gjatë luftës në Kosovë. Përulemi me respekt para viktimave, ndajmë dhimbjen me familjet e tyre dhe riafirmojmë thirrjen për drejtësi”, thuhet në njoftimin e Presidencës./Arbresh.nfo