Portieri i FC Barcelona, Joan García, foli këtë të hënë në konferencën për shtyp para ndeshjes ndaj Newcastle United në St James’ Park, e vlefshme për ndeshjen e parë të fazës së 1/8-s së finales në UEFA Champions League.

Portieri katalanas theksoi se eliminimi i mëparshëm ndaj Atlético Madrid i ka shërbyer ekipit si mësim.

“E thashë edhe pas eliminimit ndaj Atleticos. Ajo ndeshje na shërbeu për të mësuar. Jemi një ekip i ri dhe e dimë që kundërshtari në fushën e vet do të përpiqet të marrë rezultatin më të mirë të mundshëm”, u shpreh ai.

García shtoi se pushimi pa ndeshje në mesjavë gjatë dy javëve të fundit i ka ndihmuar shumë në përgatitje.

“Këto kanë qenë javë më të gjata dhe kemi pasur më shumë kohë për të punuar. Kemi përmirësuar disa gjëra, sidomos mënyrën se si bëjmë presion. Ndonjëherë nuk ishim mirë të organizuar, por në ndeshjet e fundit kemi bërë një hap përpara”, tha ai.

Sa i përket situatës zgjedhore dhe zhurmës politike rreth klubit, portieri i Barcelonës ishte i qartë.

“Ne jemi të përqendruar vetëm te loja”, deklaroi García.

Ai foli edhe për atmosferën që pritet në stadiumin e Newcastle.

“Të njohësh ambientin e St James’ Park ndihmon për të kuptuar stilin e tyre të lojës dhe atmosferën. Por çdo ndeshje është ndryshe dhe besoj se edhe ata do të ndryshojnë disa gjëra. Do të jetë një ndeshje tjetër nga ajo e fazës së ligës”, u shpreh portieri.

Duke folur për formën e tij personale këtë sezon, García u shpreh i kënaqur, por pranoi se ka ende shumë për të përmirësuar.

“Në sezonet e fundit po ndihem gjithnjë e më rehat. Kam përmirësuar disa aspekte të lojës sime. Jam ende i ri dhe kam shumë gjëra për të përmirësuar. Jam i kënaqur me sezonin tim, por dua të vazhdoj të rritem”, tha ai.

Portieri foli edhe për mënyrën e lojës së Newcastle, duke theksuar aspektin fizik të skuadrës angleze.

“Ata përpiqen të të barazojnë në duel dhe luajnë shumë një kundër një në mbrojtje sepse besojnë shumë te forca fizike. Por mendoj se ne jemi të përgatitur për ta përballuar këtë”, theksoi ai.

Në fund, García u pyet për spekulimet e verës që e lidhnin me një transferim te Newcastle, por ai bëri të qartë se zgjedhja e tij ishte gjithmonë Barcelona.

“Në verë u thanë shumë gjëra, por kur doli mundësia për te Barcelona e kisha të qartë vendimin. Pas kësaj nuk pati më asnjë telefonatë. Te Barcelona jam shumë i qetë”, përfundoi portieri katalanas./Arbresh.info