Kanë përfunduar tri ndeshjet e para çerekfinale të Kupës së Kosovës, rezultatet e së cilave nuk sollën ndonjë befasi.

Ballkani e eliminoi Gjilanin pasi e mposhti me rezultat 2-1, shkruan Arbresh.info.

Bleart Tolaj e Geralb Smajli realizuan për ekipin suharekas. Ndërsa golin e nderit për Gjilanin e shënoi Senad Jarovic.

Në përballjen tjetër mes Dukagjinit dhe Feronikelit ’74, klinasit shënuan fitore të pastër me rezultat 3-0.

Dienit Isufi, Altin Mërlaku dhe Mërgim Pefqeli i realizuan golat për ta dërguar Dukagjinin në gjysmëfinale.

Ferizaj po ashtu arriti të kaloj në gjysmëfinale pasi mposhti Vushtrrinë 2-0. Një pakujdesi e portierit të mysafirëve bëri që lojtari vendas të realizoj nga goditja këndore.

Teksa golin e dytë e shënoi Erjon Sadriu.

Nesër zhvillohet edhe sfida e fundit çerekfinale mes Malishevës dhe Llapit, ku do të mësohet edhe gjysmëfinalisti i fundit për këtë edicion.

Kujtojmë se këtë edicion do të kemi një fitues të ri të Kupës së Kosovës, pasi Prishtina si kampion në fuqi është eliminuar./Arbresh.info