Ndalohen për 48 orë tre të dyshuarit që u kapën me mbi 1 milion euro në Merdare, dyshohen për “shpëlarje të parave”

18:33 | 24 Shkurt 2026
E.G

Prokuroria Speciale ka njoftuar se janë ndaluar tre persona për 48 orë lidhur me 1 milion eurot e padeklaruara që u kapën sot në Merdare.

Sipas njoftimit, ata dyshohen për veprën penale “shpëlarja e parave”.

Të dyshuar janë A.L, A.K dhe E.A.

“Të dyshuarit A.L.,A.K., dhe E.A janë ndaluar në pikëkalimin kufitar në Merdare, pasi gjatë një kontrolli të përbashkët të realizuar nga Policia dhe Dogana e Kosovës, në një automjet që drejtohej nga njëri prej tyre është gjetur dhe sekuestruar një shumë e madhe parash. Sipas vlerësimeve fillestare, dyshohet se shuma arrin në një milion euro. Prokuroria Speciale e Republikës së Kosovës në bashkëpunim me Policinë e Kosovës, është duke ndërmarrë të gjitha veprimet e nevojshme, në përputhje me procedurat ligjore në fuqi, për zbardhjen e plotë të rastit”, thuhet në njoftim.