Dy divizionet kryesore të futbollit anglez, Premier League dhe Championship, do të zbatojnë sërish ndërprerje të përkohshme gjatë ndeshjeve për t’u dhënë mundësi lojtarëve myslimanë të ndërpresin agjërimin gjatë muajit të shenjtë të Ramazanit, i cili nis këtë të enjte.

Gjatë Ramazanit, besimtarët myslimanë agjërojnë nga lindja deri në perëndim të diellit, dhe kjo përfshin edhe sportistët profesionistë.

Futbollistët në të gjithë botën vazhdojnë të luajnë dhe të stërviten gjatë kësaj periudhe, ndërsa klubet dhe organizatorët përshtatin oraret për të respektuar besimin e tyre.

Në këtë periudhë të vitit, ndeshjet që zhvillohen në mbrëmje në Angli përfundojnë pasi dielli ka perënduar, gjë që u mundëson lojtarëve myslimanë të konsumojnë ujë dhe ushqim. Dielli zakonisht perëndon mes orës 17:00 dhe 19:00, prandaj ndeshjet që nisin në orën 17:30 të shtunave dhe 16:30 të dielave mund të përfshijnë një ndërprerje të shkurtër.

Sipas raportimeve nga mediat angleze, kapitenët e skuadrave në bashkëpunim me gjyqtarët do të gjejnë një moment të përshtatshëm për të ndalur përkohësisht lojën, si për shembull gjatë një goditjeje nga porta, goditjeje të lirë apo rivënie anësore. Kjo u jep mundësi lojtarëve dhe zyrtarëve myslimanë të ndërpresin agjërimin në mënyrë të respektueshme./Arbresh.info