Oficerë të Shërbimit Amerikan të Imigracionit dhe Doganave kanë ndaluar një fëmijë pesëvjeçar në Minnesota, gjatë një operacioni për arrestimin e babait të tij, i cili ka një kërkesë aktive për azil në Shtetet e Bashkuara.

Sipas autoriteteve shkollore, fëmija, Liam Conejo Ramos, u mor nga një automjet në oborrin e shtëpisë së familjes, teksa kthehej nga institucioni parashkollor, raporton “Al Jazeera”.

Rasti ka nxitur reagime të forta publike dhe vjen në kuadër të bastisjeve të zgjeruara të emigracionit në Minnesota, ku rreth 3,000 persona janë arrestuar javët e fundit, sipas autoriteteve federale.

Avokatët dhe organizatat për të drejtat e njeriut kanë shprehur shqetësim për kushtet në qendrat e ndalimit familjar, duke raportuar rritje të numrit të fëmijëve të ndaluar dhe përkeqësim të kushteve shëndetësore.

Zëvendëspresidenti amerikan JD Vance, gjatë një vizite në Minneapolis, tha se rasti ishte shqetësues, por mbrojti veprimet e autoriteteve federale, duke theksuar se ligjet e emigracionit duhet të zbatohen.

Hetimet dhe reagimet lidhur me këtë incident pritet të vazhdojnë, ndërsa organizatat e të drejtave civile kërkojnë transparencë dhe përgjegjësi nga autoritetet federale.