Gjykata Themelore në Pejë i ka caktuar masën e paraburgimit deri më 26 shkurt kosovarit të kërkuar nga shteti slloven.

Sipas njoftimit nga themelorja e Pejës, i kërkuari dyshohet për disa vepra penale dhe i njëjti do të jetë në paraburgim në pritje të ekstradimit të tij në Slloveni.

“Gjykata Themelore në Pejë – Departamenti për Krime të Rënda, ka mbajtur seancë dëgjimore për caktimin e masës së paraburgimit ndaj të kërkuarit E.B., shtetas i Republikës së Kosovës, i cili kërkohet nga shteti i Sllovenisë. Pas shqyrtimit të kërkesës së Prokurorisë Themelore në Pejë, gjykata ka caktuar masën e paraburgimit në pritje të ekstradimit, nga data 17.01.2026, ora 23:30, deri më 26.02.2026”, thotë Gjykata Themelore në Pejë.

Themelorja në Pejë thotë se i kërkuari nga Sllovenia E.B kërkuari dyshohet për veprën penale “Sjellje e dhunshme” sipas Kodit Penal të Republikës së Sllovenisë, si dhe për veprat penale “Sulmi” dhe “Vrasje e mbetur në tentativë”, sipas dispozitave përkatëse të Kodit Penal të Republikës së Kosovës.