Endrick ka marrë vendimin tashmë. Të martën e kaluar u konfirmua zyrtarisht huazimi i tij te Olympique Lyon deri më 30 qershor, pa klauzolë rikthimi automatik. Qëllimi i brazilianit është i qartë, të luajë në Kupën e Botës dhe më pas të rikthehet te Real Madridi për të fituar rolin që deri tani i është mohuar, fillimisht nën Carlo Ancelottin dhe më pas nën Xabi Alonson.

Në moshën vetëm 19-vjeçare, Endrick po ndërmerr një hap që mund të përcaktojë gjithë karrierën e tij, shkruan Marca, transmeton Arbresh.info.

Në Francë do të ketë hapësirë për të treguar se është i denjë për t’u rikthyer në “Santiago Bernabéu” dhe për t’u dhënë argumente atyre që nuk e kuptojnë pse ka pasur kaq pak minuta në një Real Madrid që, nga ana e golave, varet pothuajse tërësisht nga Kylian Mbappé.

Megjithatë, kjo lëvizje mbart edhe rrezik. Historia nuk është në favor të sulmuesve që largohen nga Real Madridi si të huazuar, me shpresën për t’u rikthyer dhe për t’u bërë titullarë. Praktikisht, nuk ka precedentë që ta mbështesin plotësisht bastin e Endrickut.

Shembujt e fundit nuk janë inkurajues.

Sulmuesit e fundit që dolën të huazuar nga Madridi për të fituar një vend në ekipin e parë ishin produkte të akademisë: Álvaro Rodríguez, Latasa dhe Borja Mayoral.

Në asnjërin prej këtyre rasteve nuk u hap realisht një derë për t’u rikthyer dhe për të ndarë repartin e sulmit me emra si Benzema apo Mbappé.

Në listën e “nueveve” që u larguan për t’u rikthyer pa sukses janë edhe Soldado dhe Portillo. Soldado shkëlqeu te Osasuna me 13 gola, u rikthye në Madrid, por vetëm për t’u shitur te Getafe. Portillo, një talent i madh i akademisë, nuk mundi të konkurronte me Ronaldo Nazárion dhe përfundoi në huazime të njëpasnjëshme para largimit përfundimtar.

Lista vazhdon me emra si Aganzo, Congo, Canabal, Urzaiz, si edhe sulmues të mëdhenj si Morientes dhe Eto’o. Morientes u huazua te Monaco pas ardhjes së Ronaldos, u rikthye, por me rol dytësor dhe në janar u transferua te Liverpool. Diçka e ngjashme ndodhi edhe me Baptistan, i huazuar te Arsenali dhe më pas i shitur te Roma.

Rasti i Eto’o-s mbetet një nga më të pashpjegueshmit: nuk pati kurrë një shans të vërtetë te Madridi, u huazua te Leganés, Espanyol dhe Mallorca, për t’u shitur më pas te Barcelona – një lëvizje që do t’i shkaktonte shumë dëme Realit.

Një nga të paktët që u largua i huazuar dhe u rikthye për të qëndruar disa sezone ishte Sebastián Losada, por gjithmonë si alternativë, pasi sulmi dominohej nga Butragueño dhe Hugo Sánchez.

Përjashtimi i madh historik: Grosso. Ai u huazua për disa muaj te Atlético Madridi, duke i ndihmuar rojiblancos të shpëtonin nga rënia. Pas rikthimit, u shndërrua në simbol të madridizmit, duke luajtur deri në vitin 1976 dhe duke fituar 11 trofe, përfshirë Kupën e Evropës dhe shtatë tituj kampion. Ai ishte “9-shi” legjendar i Madridit Yeyé.

Në këtë panoramë historike, Endrick po hyn në një territor të rrezikshëm. Talenti është i padiskutueshëm, por historia e Real Madridit tregon se rikthimi pas një huazimi për një sulmues qendror ka qenë gjithmonë një mision pothuajse i pamundur. Lyon do të jetë prova e tij më e madhe.