Real Madridi ka nisur punën për të ashtuquajturin “Operacioni Qendërmbrojtësi”. Rinovimi njëvjeçar i Antonio Rüdiger ende nuk është mbyllur, Éder Militao vazhdon të ketë probleme serioze me dëmtimet, ndërsa David Alaba pritet të largohet në qershor. Për këtë arsye, përforcimi i mbrojtjes është prioritet.

Në listën e klubit madrilen janë tre emra: Dayot Upamecano, Marc Guéhi dhe Nico Schlotterbeck. Mbrojtësi gjerman është i vetmi që nuk i përfundon kontrata, çka e bën transferimin e tij më të kushtueshëm dhe me më pak mundësi realizimi.

Upamecano është alternativa kryesore. Francezi kërkon rreth 40 milionë euro (pagë dhe bonus nënshkrimi), ndërsa pas tij është vënë PSG-ja. Bayern Munich ende nuk ka dhënë fjalën e fundit. Real Madridi ka një marrëveshje verbale për kushtet personale me lojtarin, por ende nuk ka asgjë të firmosur.

Guéhi fiton terren

Nëse Upamecano vendos të ndjekë një tjetër rrugë, Marc Guéhi është opsioni rezervë që po shqyrton klubi. Mbrojtësi anglez ka vendosur të largohet nga Crystal Palace në verë, por në Angli raportohet se interes për të kanë shfaqur edhe Liverpooli dhe Chelsea.

Për të mos mbetur pas në këtë garë, Real Madridi ka dërguar tashmë disa skautë në Londër për të ndjekur nga afër ndeshjet e tij dhe për të kontaktuar rrethin e lojtarit.

Një praktikë e zakonshme e Real Madridit

Klubi ka vepruar njësoj edhe në të kaluarën, si në rastet e Huijsen apo Jude Bellingham. Për anglezin, marrëveshja ishte arritur disa muaj përpara se të zyrtarizohej largimi i tij nga Borussia Dortmund, ndërsa Real Madridi kishte dërguar skautë në Gjermani për ta ndjekur nga afër.

Tregu i lojtarëve të lirë ka avantazhet dhe disavantazhet e veta. Nga njëra anë nuk paguhet tarifë transferimi, por nga ana tjetër konkurrenca është e madhe dhe kërkohet më shumë punë për të bindur lojtarin.

Mbappé, shembulli perfekt

Real Madridi është specialist në këtë lloj operacioni. Kylian Mbappé është shembulli më i mirë: francezi përballoi presionin e PSG-së dhe zgjodhi të transferohej në “Santiago Bernabéu” si lojtar i lirë, duke përfituar një bonus nënshkrimi prej 100 milionë eurosh.

Një shifër që përputhej me vlerën e tij në treg dhe që shmangu forcimin e një rivali direkt si PSG-ja. Kjo është mënyra e Real Madridit për të konkurruar me klubet-shtet. Mbappé, Alexander-Arnold, Alaba, Rüdiger… mbetet për t’u parë nëse Guéhi apo Upamecano do të jenë emrat e radhës.