Osmani në ditëlindjen e Rugovës: Trashëgimia e tij, testament për paqen

09:30 | 2 Dhjetor 2025
E.K

Presidentja e Republikës së Kosovës, Vjosa Osmani, ka përkujtuar sot 81-vjetorin e lindjes së Presidentit historik, dr. Ibrahim Rugova, të cilin e ka cilësuar si “arkitekt të pavarësisë” dhe zë të arsyes në periudhat më të vështira të vendit.

Osmani theksoi se Rugova mbetet figurë unike e qëndresës dhe e vizionit për një Kosovë të lirë, të pavarur dhe demokratike.

“Me urtësinë, kulturën politike dhe vizionin largpamës, Presidenti Rugova e ngriti çështjen e Kosovës në majat e diplomacisë botërore. Ai mbetet frymëzim i përhershëm, simbol i qëndresës dhe i ëndrrës së madhe për një Kosovë të lirë, të pavarur dhe demokratike. Trashëgimia e Presidentit është testament për paqen, për shtetin sovran dhe të integruar në familjen euro-atlantike”, shkroi Osmani./Arbresh.info