Vinicius Junior i ka bërë të ditur Real Madridit se nuk dëshiron të rinovojë kontratën, për sa kohë marrëdhënia e tij me trajnerin Xabi Alonso mbetet e tensionuar.

Mesazhi u përcoll gjatë një bisede midis Vinicius Jr dhe presidentit Florentino Perez në fund të muajit të kaluar, sipas The Athletic.

Kontrata e Vinicius Jr skadon në qershor 2027. Bisedimet për rinovimin nisën në janar, por u ndalën pasi palët nuk arritën një marrëveshje.

Pas fitores 2-1 të Madridit kundër Barcelonës më 26 tetor, Vinicius Jr u takua me Perez për t’i kërkuar ndjesë për sjelljen gjatë ndeshjes. Ai ishte zemëruar pas zëvendësimit nga Alonso në minutën e 72-të, duke dalë nga fusha i acaruar dhe duke thënë: “Gjithmonë unë, po largohem nga ekipi, më mirë të iki, do të largohem.”

Në atë takim u diskutua edhe e ardhmja e tij. Ai bëri të qartë se, për shkak të marrëdhënies së tensionuar me Alonson, rinovimi nuk është opsioni më i mirë për të. Që atëherë, qëndrimi i tij nuk ka ndryshuar.

Sipas The Athletic thuhet se ai ka shqetësime të vazhdueshme me trajnerin Alonso, i cili mori drejtimin e ekipit në maj si pasues i Carlo Ancelottit. Në tre muajt e parë të sezonit, tensionet vetëm sa janë rritur, duke u bërë temë e përditshme brenda dhe jashtë klubit.

Gjithçka nisi me humbjen 4-0 të Real Madridit ndaj PSG-së në gjysmëfinalen e Kupës së Botës së Klubeve më 9 korrik.

Alonso kishte planifikuar ta linte Viniciusin në stol, por një dëmtim i Trent Alexander-Arnold e detyroi të ndryshonte planin, dhe braziliani luajti titular, megjithatë në krahun e djathtë, jo në të majtin, ku ai preferon.

Që atëherë, Vinicius Jr ka kompletuar vetëm pesë nga 17 ndeshjet e Madridit këtë sezon dhe ka nisur nga stoli katër herë, përfshirë barazimin 2-2 kundër Elches të dielën./Arbresh.info