Deputeti i LDK-së, Armend Zemaj, është përfshirë sot në një incident në Prishtinë.

Për rastin ka shkruar vetë Zemaj përmes një postimi në Facebook.

Ai sqaroi ngjarjen se çka ka ndodhur, duke thënë se pas ofendimeve që ka marrë nga një qytetar derisa po e jepte një intervistë për një medium, ka reaguar “në vetëmbrojtje në afekt”.

Për rastin, ai ka kërkuar edhe falje publike.

“Sot gjatë një interviste publike ndodhi një situatë e pakëndshme, për të cilën ndjej keqardhje të sinqertë. Një qytetar, nuk e di a ishte e rastit apo me qellim te caktuar, këtë do e vërtetojnë policia, më ofendoi dhe më provokoi verbalisht me fjalë të papranueshme, para medias dhe gazetarit që ishim në intervistë. Në atë moment reagova në mënyrë të vetëmbrojtjes në afekt, gjë e cila nuk përfaqëson as bindjet e mia personale, as parimet që unë përfaqësoj si deputet dhe si anëtar i Lidhjes Demokratike të Kosovës”, shkroi Zemaj.

“në këto raste sulmi dhe fyerjesh të ulëta, sigurisht do duhej të ruaja qetësinë dhe dinjitetin në çdo rrethanë dhe pavarësisht provokimit, i cili nuk me ka ndodhë kurrë gjatë karrierës sime, dhuna, në çfarëdo forme, nuk është përgjigje e drejtë”.

“Për këtë veprim, shpreh keqardhje dhe kërkoj falje publike”, u shpreh deputeti i LDK-së.