Deputeti i Aleancës për Ardhmërinë e Kosovës (AAK), Daut Haradinaj, ka deklaruar se partia e tij nuk do ta mbështesë Albin Kurtin për një mandat të tretë si kryeministër të vendit.

Haradinaj theksoi se AAK-ja nuk do të japë votë për Kurtin, madje as në rast se si shkëmbim do t’u ofrohej posti i presidentit të Kosovës.

“Nuk mundet me pas në këto rrethana votë për Albin Kurti, e kemi një bjeshkë në mes. Nuk kisha dashur ta komentoj fare. Nuk do të ketë votë. Nuk ka ndryshuar diçka që ne me ndryshu qëndrim. [Nëse ua ofron postin e presidentit?]. Faleminderit shumë, nuk ia japim votën, në këto rrethana. Nuk jemi të gatshëm dhe nuk është temë më në tavolinë presidenti… Nuk e përjashtoj kurrë mundësinë që do të ketë Kurti 3, se është e padrejtë në politikë që të thuhet nuk ka me u bë. Por unë nuk shoh zgjidhje, në matematikë aq sa kam përvojë parlamentare, se ai i ka vetëm 48 deputetë, i mungojnë edhe një numër i theksuar, minimalisht edhe 14 deputetë”, ka thënë Haradinaj në një intervistë në Klan Kosova.