Universiteti i Prishtinës dhe ai i Iowa-s në SHBA, kanë nënshkruar sot një memorandum bashkëpunimi i cili parashikon nisma të përbashkëta në fushat e mësimdhënies, trajnimeve dhe kërkimit shkencor që dalin nga programi i Universitetit të Iowa-s “Partneriteti i Sektorit Privat për Forcimin e Arsimit të Lartë në Kosovë”, në bashkëpunim me Universitetin e Prishtinës.

UP-ja ka bërë të ditura detajet e marrëveshjes, duke thënë se janë paraparë edhe shkëmbime të profesorëve e të diplomuarve dhe thirrje e ftesa për pjesëmarrje në konferenca, simpoziume e seminare të Universitetit të Prishtinës dhe Iowa-s. Gjithashtu, do të ketë organizime për zhvillimin e talenteve të studentëve e profesorëve nga të dy universitetet.

“Gjatë takimit, para se të nënshkruhet memorandumi, u bë zotim i përbashkët dhe u shpreh përkushtimi që partneriteti mes dy institucioneve të arsimit të lartë të zhvillohet edhe më tutje në të ardhmen”.

Në ceremoninë solemne të nënshkrimit të memorandumit, në Rektoratin e Universitetit të Prishtinës ishin dekani i programeve ndërkombëtare në Universitetin e Iowa-s, Russell Ganim, ish-dekani i Kolegjit të Farmacisë në këtë universitet dhe profesori Donald E. Letendre, të shoqëruar nga profesoresha e Degës së Farmacisë në Fakultetin e Mjekësisë së UP-së, Pranvera Breznica-Selmani të cilët u pritën nga rektori Arben Hajrullahu.

UP-ja thotë se vitin e kaluar, me ndihmën e profesorit amerikan Donald E. Letendre, në Fakultetin e Mjekësisë u themelua Instituti i Farmacisë me qëllim të rritjes së kapaciteteve kërkimore e profesionale të Universitetit të Prishtinës dhe zhvillimit të sektorit farmaceutik në Kosovë.