Fanella me të cilën Rey Manaj bëri histori në Leskovc, shitet për mbi 3 mijë euro

16:25 | 20 Tetor 2025
D.H

Shqipëria arriti fitore historike të shtunën e kaluar ndaj Serbisë në Leskovc, me një gol të Rey Manajt në minutën e dytë shtesë të pjesës së parë.

Pas golit që mori vëmendje të madhe mediatike, tashmë është radha e fanellës së tij, me të cilën luajti në Leskovc, sulmuesi shqiptar atë ditë, shkruan Arbresh.info.

Sipas ankandit ndërkombëtar MatchWornShirt, me të cilin bashkëpunon Federata Shqiptare e Futbollit, ajo u shit për 3 mijë e 98 euro. Oferta më e madhe erdhi nga Shtetet e Bashkuara të Amerikës.

Kjo është fanella e dytë më e shtrenjtë e Kombëtares shqiptare në ankand.

Rekordin e mban ajo e Nedim Bajramit, e veshur në përballjen ndaj Italisë në Euro 2024, kur ai shënoi golin më të shpejtë në historinë e Kampionateve Europiane, pas vetëm 23 sekondash.

Ajo fanellë u ble për 5 mijë e 792 euro.