Kryetari i Lëvizjes Vetëvendosje, Albin Kurti ka vizituar dy kompani prodhuese në Ferizaj, njëra për vajra motorik dhe industrial dhe tjetra mobilje druri.

Kurti u shpreh se kandidati i LVV-së për kryetar të Ferizajt, Enver Haliti e di shumë mirë që Ferizaji e ka të gjithë potencialin për të qenë kryeqendër ekonomike rajonale, transmeton Arbresh.info.

“Ballkan Petrol në Gurëz, me pronar Imri, Zenel e Bekim Haliti, ka mbi 250 punëtorë ndërkaq Promoplast në Greme të Ferizajt, me pronar Remzi Omuri, punëson rreth 50 veta. Të dyja janë kompani prodhuese: njëra për vajra motorikë dhe industrialë, tjetra për mobilje druri, dhe të dyja produktet i eksportojnë jashtë vendit”, ka shkruar Kurti në Facebook.

“Me kryetarin e ardhshëm të Ferizajt, Enver Haliti, i vizituam mjediset e tyre të punës. Enveri e kupton shumë mirë që prodhimi është shtylla e zhvillimit ekonomik dhe e di edhe më mirë që Ferizaj e ka të gjithë potencialin për të qenë kryeqendër ekonomike rajonale. Me qeverisjen e tij, kompanitë prodhuese do të jenë në qendër të politikave mbështetëse, dhe me të kryetar të komunës, Ferizaj do të jetë kryeqendra ekonomike e rajonit”, tha Kurti./Arbresh.info