Presidenti i Shqipërisë, Bajram Begaj ka pritur sot në takim presidentin e Letonisë, Edgars Rinkevics.

Në një konferencë për media pas takimit, Begaj ka vlerësuar lartë marrëdhëniet diplomatike dhe të qëndrueshme mes dy shteteve, shkruan Arbresh.info.

“Shqipëria shpreh mirënjohje të thellë për mbështetjen e palëkundur të Letonisë për rrugëtimin tonë drejt anëtarësimit evropian, si dhe faktin që Letonia ishte vendi i parë i Bashkimit Evropian që ratifikoi Marrëveshjen e Stabilizim-Asociimit të Shqipërisë”, ka deklaruar presidenti Begaj.

Ndër të tjera, kreu i shtetit shqiptar përmendi edhe mbështetjen e Letonisë për Kosovën, veçanërisht vlerësoi thellësisht praninë e trupave letonez në misionin e KFOR-it.

“Shqiptarët e vlerësojnë thellësisht mbështetjen e Letonisë për Kosovën, si në aspektin diplomatik, ashtu edhe përmes pranisë së trupave të saj në misionin e KFOR-it. Në kuadër të NATO-s, Shqipëria dhe Letonia po forcojnë në mënyrë aktive bashkëpunimin në fushën e mbrojtjes. Prania e trupave shqiptare në bazën Ādaži është një demonstrim i qartë i solidaritetit tonë të ndërsjellë në përballjen me kërcënimet e përbashkëta të sigurisë”, u shpreh Begaj. /Arbresh.info