I arrestuari për krime lufte dyshohet se mori pjesë në vrasjen e 71 civilëve shqiptarë në Vushtrri

09:14 | 13 Shtator 2025
Q L

Policia e Kosovës ka arrestuar të premten (dje) një person të dyshuar për krime lufte kundër popullsisë civile, i cili akuzohet se mori pjesë në masakrën e 22 majit 1999 në Vushtrri, ku u vranë 71 civilë shqiptarë.

Sipas njoftimit në raportin 24-orësh, Policia më 12 shtator ndaloi të dyshuarin, shtetas kosovar, i cili gjatë luftës së viteve 1998-1999 dyshohet se ka vepruar në grup dhe në mënyrë të organizuar si pjesëtar i mobilizuar në njësi të MUP-it serb.

Hetimet e deritanishme tregojnë se ai ka marrë pjesë drejtpërdrejt në privimin nga jeta të 71 civilëve shqiptarë në komunën e Vushtrrisë.

Pas intervistimit, me vendim të prokurorit i dyshuari është dërguar në mbajtje.

Mediat serbe kanë raportuar se i dyshuari ka jetuar në veri të Kosovës dhe ka punuar si shofer autobusi.