Hekuran Murati, ministër në detyrë i Financave, pas ndërprerjes së seancës së Kuvendit para gazetarëve kritikoi partitë opozitare për mos-votimin e deputetit Nenad Rashiq për nënkryetar të Kuvendit, i cili, sipas tij, njeh shtetin e Kosovës dhe punon në vazhdimësi për integrimin e komunitetit serbë në institucionet e vendit.

Murati, më tej, përsëriti qëndrimin e LVV-së se kjo parti nuk ka asnjë votë për deputetët nga radhët e “Listës Serbe” për nënkryetar të Kuvendit, teksa tha se për këtë pozitë në Kuvend kjo parti ka shprehur preferenca për deputetin Nenad Rashiq, që, sipas tij, njeh shtetin e Kosovës dhe punon në vazhdimësi për integrimin e serbëve të Kosovës në institucionet e vendit.

Ai kritikoi partitë tjera opozitare se edhe sot nuk qenë të gatshëm të votojnë përfaqësuesin e minoritetit serb për nënkryetar të pestë të Kuvendit të Kosovës.

“Na duhet më pak se dhjetë vota nga partitë opozitare shqiptare për ta zgjedhur përfaqësuesin e minoriteti serb për nënkryetar të Kuvendit”, tha Murati, duke shtuar se nuk e kupton qëllimin e opozitës duke mos votuar Rashiqin për nënkryetar të Kuvendit.

Ai theksoi se është e domosdoshme që sa më parë të përmbyllet konstituimi i Kuvendit./rtk