Instituti i Krimeve të Kryera Gjatë Luftës ka prezantuar aneksin e Metodologjisë së Punës për dokumentimin dhe hulumtimin e krimeve ekonomike.

Kryeministri në detyrë, Albin Kurti, ka theksuar se, përveç jetëve të humbura dhe dëmeve materiale në Kosovë nga agresori serb, edhe dëmtimi ekonomik është i madh.

“Dokumentimi i këtyre krimeve ekonomike është pjesë integrale e së vërtetës historike. Përveç funksionimit arkivor e akademik është edhe instrument drejtësie e transparence. Përmes një metodologjie të qartë, profesionale dhe gjithëpërfshirëse mund të krijojmë një arkiv të besueshëm, i cili do të shërbejë për kujtesën kolektive të brezave që vijnë”, ka thënë Kurti.

Atdhe Hetemi, drejtor ekzekutiv i Institutit për Krime të Kryera Gjatë Luftës në Kosovë, përmendi arritjet e deritanishme të institutit, duke theksuar bashkëpunimet me Shqipërinë, Maqedoninë, Malin e Zi dhe Bosnje-Hercegovinën.

“Aneksi metodologjik që do të prezantohet sot është punë e përbashkët për të siguruar që mbledhja, verifikimi dhe analiza e krimeve ekonomike, sociale e kulturore të luftës të bëhen sipas standardeve më të larta etike, ligjore dhe shkencore”, ka thënë Hetemi./Arbresh.info