Ministrja në detyrë e Drejtësisë, Albulena Haxhiu bashkë me shefen e zyrës së Këshillit të Evropës në Kosovë, Mary Ann Hennessey, kanë vizituar Qendrën Korrektuese të Dubravës.

Haxhiu ka treguar se aty takuan stafin përgjegjës dhe personat e dënuar për dhunë në familje që tha se kanë përfunduar me sukses fazën e dytë të Programit Kombëtar për Trajtimin e Kryerësve të Dhunës ndaj Grave.

Ministrja në detyrë e drejtësisë ka treguar se gjatë periudhës gjashtëmujore dhjetë të dënuar për veprën penale të dhunës në familje kanë marr pjesë në trajtim.

“Gjatë kësaj vizite, u takuam me stafin përgjegjës dhe personat e dënuar për dhunë në familje që kanë përfunduar me sukses fazën e dytë të Programit Kombëtar për Trajtimin e Kryerësve të Dhunës ndaj Grave, një nismë e rëndësishme që synon adresimin në rrënjë të dhunës në familje përmes ndërhyrjes psiko-edukative dhe rehabilituese. Gjatë një periudhe gjashtëmujore, dhjetë të dënuar për veprën penale të dhunës në familje morën pjesë në një trajnim gjithëpërfshirës, i cili përfshiu module për ndërtimin e marrëdhënieve të shëndetshme, zhvillimin e aftësive për menaxhimin e emocioneve dhe rritjen e vetëdijes mbi pasojat e dhunës”, ka shkruar Haxhiu.