Dy persona janë vënë nën hetim nga Policia e Kosovës, pasi dyshohet se kanë dhënë deklarata të rreme në lidhje me një aksident trafiku me lëndime trupore, i cili ndodhi më 16 korrik 2025 në Prishtinë.

Hetimet e njësisë së trafikut zbuluan se personat e përfshirë nuk ndodheshin në veturë në momentin e aksidentit, ndonëse pretenduan të kundërtën.

“Më 16.07.2025, në kryeqytet është raportuar një aksident trafiku me lëndime trupore. Njësia e trafikut të kryeqytetit menjëherë ka nisë hetim për sqarimin e rrethanave të rastit. Gjatë hetimeve është konstatuar që në momentin e aksidentit personat e dyshuar nuk ndodheshin në veturë dhe deklarimet e tyre ishin të pavërteta e të qëllimshme për të manipuluar rrethanat e aksidentit”, thuhet në njoftim.

Pas intervistimit, me urdhër të prokurorit, ndaj tyre është iniciuar procedurë penale për veprën “Deklarim i rremë”./Arbresh.info