Ndërsa ministri sirian i Mbrojtjes ka deklaruar se është arritur një marrëveshje me milicitë druze për vendosjen e forcave qeveritare në provincën Suajda (Suweida), Izraeli i ka sulmuar ato, duke u pozicionuar në mbrojtje të këtij komuniteti.

Izraeli ka deklaruar se ka bombarduar forcat qeveritare siriane përreth qytetit Suweida (Suwajda), të cilat thuhet se kishin hyrë në qytetin e dominuar nga pjesëtarë të komunitetit druz, pas përleshjeve dyditore mes milicive lokale dhe fiseve beduine. Mësohet se rreth 100 persona kanë humbur jetën që nga e diela, kur nisën përleshjet.

Ministri sirian i Mbrojtjes ka njoftuar për arritjen e një armëpushimi në Suweida, duke thënë se është arritur marrëveshje me përfaqësues lokalë për vendosjen e forcave të sigurisë. Megjithatë, një lider shpirtëror i komunitetit druz u ka bërë thirrje luftëtarëve lokalë që të vazhdojnë rezistencën.

Ndërkohë, kryeministri i Izraelit, Benjamin Netanjahu, ka deklaruar se ka urdhëruar sulme ndaj forcave dhe armatimeve në zonën e Suweidës, pasi ? sipas tij ? qeveria siriane kishte për qëllim t’i përdorte ato kundër pjesëtarëve druz.

Netanjahu tha se është i përkushtuar për të parandaluar dëmtimin e druzëve në Siri, për shkak të lidhjeve të ngushta me komunitetin druz që jeton në Izrael dhe në Rrafshnaltën e Golanit të okupuar nga Izraeli.

Kjo është hera e parë që forcat qeveritare siriane pozicionohen në Suweida, që kur forcat rebele të udhëhequra nga islamistët rrëzuan presidentin Bashar al-Asad në dhjetor.

Komunitetet minoritare mbeten të dyshuara ndaj udhëheqësve të rinj të vendit, pavarësisht premtimeve të këtyre të fundit për t?i mbrojtur ato. Deri më tani, vetëm provinca e Suweidës kishte mbetur nën kontrollin e milicisë druze, e cila kishte refuzuar t?u bashkohej forcave qeveritare./rtk