Drejtori i Përgjithshëm i Administratës Tatimore të Kosovës, Ilir Murtezaj, po merr pjesë në Takimin Vjetor Koordinues (ACM 2025) që po mbahet në selinë e Bankës Kombëtare të Belgjikës në Bruksel.

“Konferenca mblodhi përfaqësues e lartë nga administratat tatimore dhe ministritë e financave të vendeve të Ballkanit Perëndimor, në kuadër të fazës së III të Reformave Fiskale në Evropën Juglindore (2023-2026), një nismë e përbashkët e Departamentit të Çështjeve Fiskale të FMN- së (FDA), Komisionit Evropian (DG NEAR) dhe Sekretariati Shtetëror Zviceran për Çështje Ekonomike (SECO)”, thuhet në njoftimin nga ATK-së.

Sipas këtij institucioni, gjatë konferencës, Murtezaj prezantoi përvojën e ATK-së në proceset e modernizimit, digjitalizimit dhe forcimit të kapaciteteve për mbledhjen efektive të të hyrave, si dhe angazhimin e institucionit në përmbushjen e prioriteteve të reformës fiskale.

Ai theksoi rëndësinë e bashkëpunimit rajonal dhe të koordinimit me partnerët ndërkombëtarë për ndërtimin e një administrate tatimore efikase dhe transparente.

“Pjesëmarrja e ATK-së në këtë ngjarje të rëndësishme shënon një hap të mëtejshëm në drejtim të integrimit të praktikave të avancuara ndërkombëtare në sistemin tatimor të Kosovës, duke forcuar pozicionin e saj në platforma rajonale të politikës dhe administrimit fiskal”, thuhet më tej në njoftim.