Flutur Mustafa ka dhënë dorëheqje nga posti i Shefes së Kabinetit të ministrit në detyrë të Bujqësisë, Faton Peci.

Lajmin e ka bërë të ditur vetë ajo përmes një njoftimi në rrjetin social Facebook.

Në postimin e saj, Mustafa tha se ka vendosur të largohet për të ndjekur sfida të reja në përputhje me zhvillimin e saj personal dhe profesional.

Postimi i plotë:

Pas një angazhimi intenziv 4 vjecar fillimisht si Këshilltare Politike dhe Zëdhënëse e pastaj edhe si Shefe e Kabinetit në Ministrinë e Bujqësisë, para Ministrit në detyrë Faton Peci, sot kam paraqitur dorëheqjen time.

Që nga dita e parë, kam dhënë maksimumin tim që këtë detyrë ta kryej me përkushtim të plotë, ndershmëri dhe krenari, bazuar në kërkesat e eprorit tim. Kam dhënë më të mirën time, dhe njëkohësisht kam mësuar më shumë nga ç’mund ta përfytyroja, përvojë kjo e cila më ka rritur si profesionalisht ashtu edhe në aspektin njerëzor.

E kam marrë këtë vendim me bindjen se tani është momenti për të hapur një faqe të re në jetën time, në përputhje me zhvillimin tim personal dhe qëllimet e mia për të ardhmen.

Faleminderit Ministrit në detyrë, z. Faton Peci, për besimin, bashkëpunimin dhe mundësinë, për t’i shërbyer Kosovës.

Një falenderim i shkon gjithashtu stafit të Kabinetit dhe gjithë zyrtarëve të MBPZHR-së për rrugëtimin e përbashkët e mbështetjen gjatë gjithë kësaj kohe.

Kjo nuk është një shkëputje lamtumirëse sepse bashkë do të shihemi në arena të tjera, ku kontributi për Kosovën mbetet parësor!/Arbresh.info